Friday,November 15,2019
കണ്ണൂര്‍: ആരോഗ്യ രക്ഷയ്ക്ക് മാലിന്യ മുക്ത പരിസരം എന്ന ലക്ഷ്യവുമായി കുട്ടികളുടെ പഞ്ചായത്ത്-വാര്‍ഡ് തല ക്യാമ്പുകള്‍ക്ക് മെയ് മാസത്തില്‍ തുടക്കമാവും. ഹരിതകേരളം മിഷന്‍, കുടുംബശ്രീ മിഷന്‍, കില, ശുചിത്വ മിഷന്‍, ആരോഗ്യ വകുപ്പ് എന്നിവയുടെ സംയുക്താഭിമുഖ്യത്തിലാണ് ക്യാമ്പുകള്‍ സംഘടിപ്പിക്കുന്നത്.
പെന്‍സില്‍ എന്ന പേരില്‍ നടക്കുന്ന ദ്വിദിന ക്യാമ്പുകള്‍ക്ക് തദ്ദേശസ്വയംഭരണ സ്ഥാപനങ്ങളാണ് നേതൃത്വം നല്‍കുന്നത്. കഴിഞ്ഞ വര്‍ഷം അവധിക്കാലത്ത് സംഘടിപ്പിച്ച ജാഗ്രതോത്സവ ക്യാമ്പുകളുടെ തുടര്‍ച്ചയായാണ് പെന്‍സില്‍ ക്യാമ്പ്. പ്രകൃതി സൗഹൃദ വസ്തുക്കള്‍ കൊണ്ട് നിര്‍മ്മിച്ചതും പൂര്‍ണമായി ഉപയോഗിച്ച് തീര്‍ക്കാം എന്ന പെന്‍സിലിന്റെ സവിശേഷ ഗുണവും പരിഗണിച്ചാണ് അവധിക്കാല ക്യാമ്പുകള്‍ക്ക് പെന്‍സില്‍ എന്ന് പേര് നല്‍കിയത്. മാലിന്യത്തിന്റെ അളവ് കുറക്കുകയും പരിസ്ഥിതി സൗഹൃദ വസ്തുക്കള്‍ കൂടുതലായി ഉപയോഗിക്കുകയും ചെയുന്ന ശീലം വളര്‍ത്താന്‍ ലക്ഷ്യമിട്ടുള്ള ക്യാമ്പുകളാണ് പഞ്ചായത്ത്-വാര്‍ഡ് തലങ്ങളില്‍ നടക്കുക.
പഞ്ചായത്ത്-വാര്‍ഡ് തല ക്യാമ്പുകള്‍ക്ക് മുന്നോടിയായുള്ള ജില്ലാതല റിസോഴ്സ് പേഴ്സണ്‍ പരിശീലന പരിപാടികളുടെ ആദ്യ ഘട്ടം ഏപ്രില്‍ 29, 30 തീയതികളില്‍ തളിപ്പറമ്പ ഇന്‍ഡോര്‍ പാര്‍ക്കില്‍ നടക്കും. തദ്ദേശ സ്വയംഭരണ സ്ഥാപനങ്ങളില്‍ നിന്നുള്ള രണ്ടു വീതം റിസോഴ്സ് പേഴ്സണ്‍മാരാണ് ക്യാമ്പില്‍ പങ്കെടുക്കുക. രണ്ടാം ഘട്ട പരിശീലനം മെയ് രണ്ട്, മൂന്ന് തീയതികളിലാണ്. ജില്ലാതല റിസോഴ്സ് പേഴ്സണ്‍ പരിശീലനത്തെ തുടര്‍ന്ന് ബ്ലോക്ക് തല പരിശീലനങ്ങള്‍ ആരംഭിക്കും.
ബ്ലോക്ക് തല പരിശീലനത്തില്‍ ഗ്രാമപഞ്ചായത്ത്-മുനിസിപ്പല്‍ തലങ്ങളില്‍ നിന്നുള്ള അഞ്ചു പേരാണ് പങ്കെടുക്കുക. ജില്ലാ-ബ്ലോക്ക് തല റിസോഴ്സ് പരിശീലനം പൂര്‍ത്തീകരിക്കപ്പെടുന്നതോടെ പഞ്ചായത്തുതല കുട്ടി ക്യാമ്പുകള്‍ക്ക് തുടക്കമാവും. വാര്‍ഡ് തലത്തിലും ഈ ക്യാമ്പുകള്‍ നടക്കും. വിവിധ മാലിന്യങ്ങളെ തരം തിരിച്ച് സൂക്ഷിക്കുവാനുള്ള രീതികളാണ് ക്യാമ്പുകളില്‍ പരിശീലിപ്പിക്കുക.
ഈ വാര്‍ത്ത നിങ്ങള്‍ക്കായി സമര്‍പ്പിക്കുന്നത്:-
