കണ്ണൂരില്‍  21,000 പ്രചാരണ സാമഗ്രികള്‍ നീക്കം ചെയ്തു

KOL NEWS DESK

കണ്ണൂര്‍: തെരഞ്ഞെടുപ്പ് പെരുമാറ്റച്ചട്ടം ലംഘിച്ച് പൊതുസ്ഥലങ്ങളിലും സര്‍ക്കാര്‍അര്‍ധ സര്‍ക്കാര്‍ കെട്ടിടങ്ങളിലും പരിസരങ്ങളിലും മറ്റും സ്ഥാപിച്ച 21,000ത്തോളം പ്രചാരണ സാമഗ്രികള്‍ ആന്റി ഡീഫെയ്‌സ്‌മെന്റ് സ്‌ക്വാഡുകള്‍ ജില്ലയില്‍ നീക്കം ചെയ്തു. 16491 പോസ്റ്ററുകള്‍, 1503 ബോര്‍ഡുകള്‍, ബാനറുകള്‍, 2207 കൊടികള്‍, 762 ചുവരെഴുത്തുകള്‍ തുടങ്ങിയവയാണ് വിവിധ നിയോജക മണ്ഡലങ്ങളില്‍ നിന്ന്  ആന്റി ഡീഫെയ്‌സ്‌മെന്റ് സ്‌ക്വാഡുകള്‍ നീക്കം ചെയ്തത്. വിവിധ പ്രദേശങ്ങളില്‍ രാഷ്ട്രീയ പാര്‍ട്ടികളും സര്‍വീസ് സംഘടനകളും മറ്റും നിയമവിരുദ്ധമായി സ്ഥാപിച്ച പ്രചാരണ സാമഗ്രികളാണ് നീക്കംചെയ്തത്. അനധികൃതമായി സ്ഥാപിച്ച പ്രചാരണ സാമഗ്രികള്‍ തെരഞ്ഞെടുപ്പ് പ്രഖ്യാപിച്ചതിനു ശേഷം മാര്‍ച്ച് 11 മുതലാണ് നീക്കം ചെയ്ത് തുടങ്ങിയത്. പയ്യന്നൂര്‍ 861, കല്യാശ്ശേരി 1466, തളിപ്പറമ്പ് 1928, ഇരിക്കൂര്‍ 2105, അഴീക്കോട് 1818, കണ്ണൂര്‍ 2693, ധര്‍മടം 1555, തലശ്ശേരി 1811, കൂത്തുപറമ്പ് 1371, മട്ടന്നൂര്‍ 1546, പേരാവൂര്‍ 2834 എന്നിങ്ങനെയാണ് മണ്ഡലം തല സ്‌ക്വാഡുകള്‍ നീക്കം ചെയ്ത സാധനങ്ങളുടെ കണക്കുകള്‍. ഇതിനു പുറമെ ജില്ലയ്ക്ക് പൊതുവായുള്ള രണ്ട് ആന്റി ഡീഫെയ്‌സ്‌മെന്റ് സ്‌ക്വാഡുകള്‍ വിവിധ ഭാഗങ്ങളില്‍ നിന്നായി 975 പ്രചാരണ സാമഗ്രികളും നീക്കം ചെയ്തു. സ്‌ക്വാഡുകള്‍ എടുത്തുമാറ്റിയ പ്രചാരണ സാമഗ്രികളുടെ ചെലവും അവ നീക്കംചെയ്യുന്നതിനുള്ള ചെലവും ബന്ധപ്പെട്ട സ്ഥാനാര്‍ഥിയുടെ തെരഞ്ഞെടുപ്പ് കണക്കില്‍ ഉള്‍പ്പെടുത്തുന്നതിനായി കണക്കാക്കി ചെലവ് നിരീക്ഷണ സെല്ലിന് കൈമാറിയിട്ടുണ്ട്. സ്വകാര്യ വ്യക്തികളുടെ സ്ഥലങ്ങളിലും മതിലുകളിലും മറ്റും പോസ്റ്ററുകള്‍ പതിക്കുന്നതിനും ബോര്‍ഡുകളും കൊടികളും സ്ഥാപിക്കുന്നതിനും ചുവരെഴുതുന്നതിനും അവരില്‍ നിന്നുള്ള രേഖാമൂലമുള്ള അനുവാദം വാങ്ങിയിരിക്കേണ്ടതാണെന്നും അല്ലാത്തപക്ഷം അത് പെരുമാറ്റച്ചട്ട ലംഘനമായി കണക്കാക്കുമെന്നും ജില്ലാ തെരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കലക്ടര്‍ അറിയിച്ചു.

Related Posts